Bandooq Taantay HaiN, Hadaf Dekht..... By Zia Mazkoor

غزل

بندوق تانتے ہیں، ہدف دیکھتے ہیں، بس!

اپنا ہے بے ضرر سا شغف، دیکھتے ہیں بس!

وہ، جن کو مانگنا بھی پڑے ، اور لوگ ہیں

ہم لوگ آسماں کی طرف دیکھتے ہیں بس

تو دیکھ بس خلا میں معلق یہ کائنات

اس سے پرے تو اہلِ شرف دیکھتے ہیں بس

اپنی جگہ پتہ ہے سو مسجد میں جا کے ہم

جوتوں کے آس پاس کی صف دیکھتے ہیں بس

مجھ کو بہ غور دیکھ کے کہنے لگا فقیر

ایسے مریض، شاہِ نجف دیکھتے ہیں بس

گھڑیاں تو بیچ دی تھیں، برے وقت میں، تمام

اب عادتاً قمیص کے کف دیکھتے ہیں بس

سنتے ہیں خواب میں، "طلع البدر" کی صدا

اور چند پاک ہاتھوں میں دف دیکھتے ہیں بس

جب کوئی پوچھے، "خود کو کہاں دیکھتے ہیں کل؟"

ہم اپنی خاک، خاک سے لف دیکھتے ہیں بس

عمیر نجمی

Ghazal

Bandooq taantay haiN, hadaf dekhtay haiN, bas!

Apna hai bezarar sa shaghaf, dekhtay haiN bas!

Woh, jin ko mangna bhi paRay, aur log haiN

hum log aasmaN ki taraf dekhtay haiN bas

Tu dekh bas khalaa maiN muallaq ye kaainat

Is se paray to ehl-e-sharaf dekhtay haiN bas

Apni jagah pata hai so masjid maiN ja k hum

JootoN k aas paas ki saf dekhtay haiN bas

Mujh ko baghaur dekh k kehnay laga faqeer

Aisay mareez, Shah-e-najaf dekhtay haiN bas

GhaRiaN to baich di thiN, buray waqt maiN, tamam

Ab aadatan qamees k kaf dekhtay haiN bas

Suntay haiN khwab maiN, "Tala'al Badr" ki sada

Or chand paak hathoN maiN daf dekhtay haiN bas

Jab koi puchay, "khud ko kahaN dekhtay haiN kal?"

Hum apni khaak, khaak se laf dekhtay haiN bas

Umair Najmi